Terça-feira, 31.10.06

L purmeiro de Novembre

Yá ye manhana l die de todos ls santos ou die purmeiro de Novembre. Ye un die an que todos nós nos lhembramos daqueilhes que yá partírun i bamos a la missa (alguns!!!) i al cemiteria a ber-los. Pensamos na bida i nel que fazimos deilha, bemos que eilha ye demasiado curta i temos que la bibir l melhor que pudimos.

Mas l purmeiro de Novembre tamien ye la fiesta de las bruxas, mais conhecida hoije an die cumo "Hallowen". Las bruxas, ls sous feitiços, las sues magias, las sues rezas i todo quie les diç respeito assusta muita giente, atrai la curiosidade de outra tanta i nunca deixa naide andiferente, mismo aqueilhes que dizen que nun acreditan neilhas ou inda aqueilhes que dizen que nun acrediten, mas que eilhas eijisten, eijisten.

Hoije a la nuite, muitos de bós ides salir de las buossas casas i ides pa ls cafes ou pa las çcotecas a brincar todas estas stórias que se cúntan sobre las bruxas i a çqecer las cousas menos buonas de las buossas bidas, mas antes disso ri-bos un cachico cun esta lhona, sobre dous cumpadres, que me pariece ten algo a ber cun l die:

Era ua beç dous compadres i apuis un die, a un deilhes, morriu-se-le un burro i fui-se a casa de l outro compadre todo zanimado, quaije que a pingar la monca, i diç-le:
— Ah... compadre, nun sabeis... morriu-se-me l burro!
I diç-le  outro:
— Nun téngades pena, se l soubirdes aporbeitar nun perdeis nada.
L compadre, a que se le tenie morrido l burro, botou las manos al queixo i quedou a pensar...
I diç-le l outro:
— De la çamarra un bombo, de las costielhas un biendo, de l spinaço l cabo, de las tripas ua guitarra, de las oureilhas uas suolas, de ls dientes uns pentes, de ls uolhos uns botones, de las caçcanhetas uas conchas, de l rabo ua striga, de ls cuxones uns tacones i de la gaita uas biras.
I diç-le mi agudo l compadre zgustoso:
— Ah compadre, por amor de Dius, calhai-bos que yá me fazeis rir!

testo de l sítio mirandes.net

Spero que bos ria-des un pouco i que lhougo a la nuite bos dibirtades cun moderaçon, porque ni you nin naide quier boltar a chorar... (Pedro, naide te çquece)

Cun las melhores saudaçones,

Raposa.

sinto-me:
música: Losing A Friend by Beyonce
publicado por Streilha às 16:32 | link de l post | comentar | Juntar als faboritos
Sexta-feira, 20.10.06

Pertual...

Ne l die cinco de Outubre fui, cumo todos nós sabemos, l die de la República Pertuesa. Muitos só béian este die cumo sendo más un feriado, mas nó. Este die, ye l die que marca la noussa andependencia de Spanha, ye l die an que nós ganhemos la noussa eidentidade, ye l die que fizo de nós ls filhos del paiç más guapo i más fidalgo que algún die eijistiu na Tierra. Só tengo pena daqueilhas almas que nun cunsiguen ber isso... Nós, más que ningún outro pobo nieste planeta debíamos ter ourgulho nel nuosso paiç. Por nós i pra tenernos todo l que tenemos i sermos todo l que somos hoube dezde hai más de dieç siclos muitos homes i mulhieres que lhuitorún, que dorún sues bidas por nós. Nós somos de l paiç que más lhuitou pa eijistir, que çcobriu l camino por mar pa la Índia, nós somos l paiç que ganhou las maiores batalhas que algua beç hoube, nós somos de l paiç que gobernou l mundo por más anhos, nós somos de l paiç que nún ten guerras cun naide i que todos respeitan i gustan, nós somos l paiç que fizo la melhor expo de siempre, nós somos de l paiç que fizo l melhor campeonato de futebol de l'Ouropa de siempre, nós somos de l paiç que...

Eiqui nacirún algunas da las maiores pessonas, reis, guerreiros, gobernantes, estrategas, professores, cientistas, escritores... que l mundo algua beç cunheciu. Eiqui nacirún Viriato, D. Afonso Henriques, Nuno Álvares Pereira, la Padeira de Aljubarrota, Pedro Álvares Cabral, Vasco da Gama, Bartolomeu Dias, Gil Eanes, D. Manuel II, D. João V, Egas Moniz, Fernando Pessoa, José Saramago, Amália, Álvaro Cunhal, Mário Soares, Sobrinho Simões, Freitas do Amaral, António Damásio, António Guterres, Durão Barroso, José Mourinho, Figo, Leonel Vieira, Mariza, Cristiano Ronaldo.... i tantos i tantos outros.

Nun ye por ser pertués que somos malos, nun ye por ser pertués que ls outros son melhores, ye por ser pertués que quando nacimos yá somos superiores als outros i cuntinuar a se-lo depiende apenas de nós. Aqueilhes que bos disse arriba yá l cunseguirún i bós? Oubi dezir que tenie sido feito ún anquérito que dezie que quaije metade de ls pertueses querían ser spanholos, mas ser spanholo nun ye melhor, ser spanholo nun bos resolvie ls porblemas, ser spanholo apenas bos parecie ser melhor por eilhes, que nun sendo tan ricos cumo nós quando nacén, apuis de crecíren trabalhán i trabalhán i trabalhán até que consiguén ser cada beç melhores, porque nun tentais fazir l mismo? Aposto que se isso acuntecisse Pertual iba-bos a parecir bien melhor que Spanha i sabeis qual serie la respousta de ls spanholos? Nun yera chorar, quedar deprimido ou querer ser pertués, la respousta, pertuesas i pertueses, serie trabalhar, trabalhar i trabalhar inda más.

Pensai nisto.

Cun las melhores saudaçones,

Raposa.

sinto-me:
música: Adeus que me vou embora by Camané
publicado por Streilha às 16:53 | link de l post | comentar | Juntar als faboritos
Sábado, 07.10.06

Nuobo trabalho, nuoba bida.

Bieno Setiembre, yá ampeçou Outubre i cun eilhes benirun l Outono, las aulas i l tiempo de ir a la scuola. Cumo bamos daprender cousas nuobas hai que studar i así yá nun tenemos tanto tiempo pa ir a fiestas cumo faziemos ne l Berano. Anton pa que bos recordeis de las lhonas que cuntabamos als nuossos amigos nas longas nuites de la caliente estaçon, deixo-bos eiqui esta stória.

Habie ua tie que era mi beiladeira i que nun podie oubir un toque que lhougo se ponie a beilar. Un die staba a amassar ua fornada de pan i a oubir benir la gaita pula rue a riba. Anton dixo-le al home:

- Bai amassando que you yá bengo.
I ala, scapou-se lhougo pa la rue i puso-se abeilar.

L home que remédio tubo senó agarrar-se a la massa. Mas cumo nun era capaç de dar cunta de l amassaduro gritou-le pa la tie:

- Dientes de restrielho,cara de podón, l que me deziste, nun se me cumpón.
La mulhier respundiu-le de la rue, sin perder lbaile:

-Deita-le farina, deita-le farina que eilha se cumponerá.

La tie querie mas era beilar, que l’amportaba a eilha de la massa i de lhome!

testo con modificaçones de l sítio mirandes.net

Cun las melhores saudaçones,

Raposa.

sinto-me:
música: Chin glin din
publicado por Streilha às 03:12 | link de l post | comentar | Juntar als faboritos

I eiqui stamos nós outra beç

I al trabalho boltamos, a la scuola retornamos, pa la ounibersidade bamos, la casa de ls nuossos pais deixamos, la nuossa cidade i las nuossas aldés abandonamos, pa ir a las nuossas bidas... alhá onde l nuosso çtino nos spera. La bida ye cumo la lhuna: ye redonda porque ye cumo un ciclo en que en el fin de un momento, ampeçamos todo outra beç e fazemos outras cousas i acabamo-las i ampeçamos outras...; la bida ye chena fragas, calhaus i pedregulhos cun cobas, grutas i scunderijos, ten siempre dificuldades que tenenos que bencer, tenemos siempre porblemas i quando resolbemos un apariece siempre outro; mas l mais amportante ye que la bida tal cumo la lhuna ten ua parte scura an que stamos tristes i só bemos las cosas malas i ua outra parte mi  branca, mi brilhante que relhuç, que relhampa i an que bemos la lhuç i somos felizes, çquecemos las tristezas i aprobeitamos l que la bida ten pa nos dar. I así ten de ser anquanto bibimos, tenemos que gozar l tiempo que tenemos. Tenenos que fazer todo l que podemos para ne l fin de l die podirmos dezir: You sou feliç. I así ten de ser anquanto tenemos família, amigos, sonhos i deseijos... I eiqui stamos nós outra beç.

sinto-me:
música: I'll always be right there by Brian Adams
publicado por Streilha às 02:31 | link de l post | comentar | Juntar als faboritos

mais sobre mi

percurar

 

Outubro 2006

D
S
T
Q
Q
S
S
1
2
3
4
5
6
7
8
9
10
11
12
13
14
15
16
17
18
19
21
22
23
24
25
26
27
28
29
30

posts inda calenticos

últimos comentairos

  • Poesie linda! Muitos Parabienes! :-)
  • Buonas nuites,O IV Encontro dos Blogueiros Mirande...
  • L poema yá ye magnífico an pertués mas, an mirandé...
  • Que raposa mas guapa¡¡;)
  • Bun anho nuobo
  • bonita a musica
  • Precissamos ajuda com a Biquipédia mirandesahttp:/...
  • Muito lindo. Regressei hoje das terras de Miranda ...
  • Nun sera ua storia de plasticos ou algo assi ?
  • PATRIMÓNIO ORAL E IMATERIAL DAS TERRAS DE MIRANDA....

Posts mais comentados

arquibos

tags

links

participar

subscrever feeds

blogs SAPO