Diairo de Biaige - Parte II

Cumo quien anda de die, you ando de nuite. Sou cumo quien nunca bê, mas siempre l oube. Cumo ls que ban por ende, you bou por eiqui. Sou cumo quien piensa, mas nunca s’acha l que ye.

Ye Berano i ando you por caminos del miu paiç. Stá calor i you eiqui l sinto i recibo.

Sou mirandesa, mas outros nó. Sou l que mostro, mas outros nó.

Sou Raposa i tengo proua. I li algures que la palabra ye prata, mas l silêncio ye ouro.

I yá que palabra falada nun puodo dezir, porque naide l’oubirie, digo palabras nel silêncio de la scrita que outros oubiran nel silêncio de la lheitura. I assí cuorre la bida...

Uns scriban, outros leian, uns falan, outros scuitan, mas todos sin excepçon tenen un lhugar nel mundo, todos tenen un papel, mas nin todos, contudo, acertan nel sou. Acertarei you nel miu? Cada die que passa, ye mais un passo pra you l çcobrir.

Apesar disso, nun stou cierta que algun die l saberei ou tenerei la certieza, porque nunca sabemos todo, nin nunca de todo tenemos certieza. Ls sábios dizen mismo, que só ls loucos tenen certiezas. Fagamos anton de la nuossa bida ua çcubierta i çcubramos l que pudirmos de nós mismos i çcubramos l que cunseguirmos del mundo que stá a la nuossa buolta. Beiamos l belo que hai na criaçon. Tiremos conclusones del malo. Aporbeitemos l que de positibo hai. Aprendamos cun l passado, olhemos pal feturo i sobretodo bibamos l presente que ye l die de hoije. Seiamos felizes, que ye l que lhebamos diesta bida. Quien nos paga pra quedarmos tristes? Quien nos manda nun star cuntentes? Bibamos l tiempo que temos, que l tiempo, esse çcachapiedras, nun spera por nós, nun spera que nós queiramos acordar pa la bida, nun spera pul die an que quesirmos ampeçar a bibir pa ampeçar a cuntar, l cunta siempre. Assí, spero, que apuis disto pensemos, cuncurdemos i aporbeitemos las fiestas del berano i las férias pa nos alhegrarmos i çcarnsarmos de las canseiras del resto del anho.

 

Cun las melhores saudaçones,

Raposa.

música: Put your records on by Corine Bailey-Ray
publicado por Streilha às 01:34 | link de l post | comentar | Juntar als faboritos