Terça-feira, 05.10.10

Cien Anhos

Apuis de cien anhos de República tengo cada beç menos certiezas sobre eilha, tal cumo acerca de la Monarquie.

L que me parece mais cierto ye que l que ampuorta mismo nun ye l sistema, mas las pessonas. Las que l gobernan, las que l bíban, las que assumen las sues repunsablidades i las que fazen l contrairo i nun las assumen.

Hoije, tal cumo onte, transdonte i hai cien anhos ls porblemas son ls mismos. Curiosamente (ou nó) la forma de pensar i de agir de las pessonas tamien ye la misma.

Toda la giente sabe que hai cien anhos, ne l die 5 de Outubre de 1910, ampeçou la República i caiu la Monarquie. Mas quantos sabén porquei que las pessonas nun querien mais la Monarquie? Quantos ténen cuncéncia que las razones que reboltórun las pessonas i deitórun abaixo la Monarquie son las mismas pulas quales hoije todos critican gobierno atraç de gobierno que bamos tenendo?

Anquanto ls nuossos modos de pensar i fazir nun mudáren, nada mudará. Benga l gobierno que benir. Até mismo l melhor que algun die eisistiu ou eisistirá ne l mundo. La mudança será feita i ls porblemas resolbidos quando cada un de ls Pertueses fazir la sue parte. Trabalhar i honrar sue Pátria Mai i tener balores morales i seguir-los. Até alhá todo quedará eigual. Ou pior.

Cumpatriotas, you pienso cumo Fernando Pessoa. Acredito que nun poderie haber nacido nun paiç melhor. Acredito que ser Pertués ye ua de las melhores cousas que puoden acuntecer a alguien. Nien todos ls países de l Mundo ténen la belheza de l nuosso. Nien todos ls países de l mundo ténen ua tierra adonde brotan plantas i que dan pan. Nien todos ls países de l mundo ténen auga pa buer. Nien todos ls países de l mundo ténen paç i inda menos ténen buonas relaçones diplomáticas. Nien todos ls países de l mundo stan lhibres de catástrofes naturales i nós bamos stando (pul menos la maiorie de las que tenemos son por nuossa culpa). Nien todos ls países de l mundo ténen formas de perduzir einergie i nós tenemos. Nien todos ténen un Sistema Nacional de Salude i nós tenemos. Nien todos ténen acesso a Porteçon Social i nós tenemos. Nien todos ténen stradas i bies de comunicaçon i nós bamos tenendo. Nien todos ténen acesso a la eiducaçon i nós tenemos (tanto quanto las pessonas quergan ou a isso se dispongan). Nós tenemos eimensas cousas a que naide dá balor até que las pierde. Muitos, mas mismo muitos países i muitas, mas mismo muitas pessonas ne l mundo darien todo pa teneren metade de l que tenemos. Porque la maiorie nun las ten. I nós sí.

Falta-nos muita cousa? Sí, falta. Mas stá nas nuossas manos i an las nuossas manos solamente cunseguir-las.

Quereis-las?

Ide por eilhas.

Tenemos muitos porblemas? Sí, tenemos. Mas outra beç: stá nas nuossos manos i an las nuossas manos solamente tratar deilhos.

L stado eisiste pa gobernar, pa gerir l que ye de todos: nó pa trabalhar por nós.

Cumo Fernando Pessoa acredito que la nuossa alma ye grande, que l nousso paiç ye mais grande que l tamanho qu'an tierra se bei, ten l tamanho de l que quejirmos. Se nós quejirmos, somos capazes de todo i mais algua cousa.

Tamien creio ne l Quinto Ampério. (Podeis-me chamar lírica, cumo miu Pai, que you nun m'ampuorto.)

You acredito an nós. You acredito ne ls Pertueses. You acredito an Pertual. I bós?

 

Nien rei nien lhei, nien paç nien guierra,

Define cun perfil i ser

Este fulgor baço de la tierra

Que ye Pertual a antristecir –

Brilho sien lhuç i sien ardir,

Cumo l que l fuogo-fátuo ancierra. 

Naide sabe que coisa quier.

Naide conhiece qu'alma ten,

Nien l que ye mal nien l que ye bien.

(Qu'ancia çtante pierto chora?)

Todo ye ancierto i derradeiro.

Todo ye çpierso, nada ye anteiro.

Ó Pertual, hoije sós cenceinho... 

Ye la Hora! 

Valete, Frates!

Fernando Pessoa

 

 

Se nós nun acreditarmos an nós i ne l que tenemos quien bai acreditar? Se nós nun lhuitarmos por Pertual quien bai lhuitar? Ls de fuora?

(Sperai por essa!)

música: Eu não sei quem te perdeu by Pedro Abrunhosa
publicado por Streilha às 21:16 | link de l post | comentar | Juntar als faboritos
Sábado, 19.06.10

Era ua beç, Saramago.

"Era ua beç un Rei que feç la pormessa de lhebantar un cumbento an Mafra. Era ua beç la giente que construiu esse cumbento. Era ua beç un suldado maneta i ua mulhier que tenie poderes. Era ua beç un cura que querie bolar i morriu boubo. Era ua beç."

 

Era ua beç un lhibro sobre un Memorial dun Cunbento an Mafra. Era ua beç un prémio Nobel. Era ua beç ua scrita que abrolhaba cumo un manantial dun rigueiro. Era ua beç ua pontuación tan genial i tan simples. Era ua beç ua alma de Pertual. Era ua beç José Saramago.

 

L miu sentido pesar.

publicado por Streilha às 02:47 | link de l post | comentar | Juntar als faboritos
Quinta-feira, 13.05.10

Eiras de l Cemaque

publicado por Streilha às 03:06 | link de l post | comentar | Juntar als faboritos
Sábado, 16.01.10

Dizen que an cada cousa mora ua cousa ouculta

Dizen que an cada cousa ua cousa ouculta mora.
Si, ye eilha própria, la cousa sin ser ouculta,
Que mora neilha.

Mas you, cun cuncéncia i sensaçones i pensamiento,
Serei cumo ua cousa?
Que hai a mais ou a menos an mi?
Serie buono i feliç se you fuosse solo l miu cuorpo -
Mas sou tamien outra cousa, mais ou menos que solo isso.
Que cousa a mais ou a menos ye que you sou? 

L biento sopra sin saber. 
La planta bibe sin saber.
You tamien bibo sin saber, mas sei que bibo.
Mas saberei que bibo, ou solo saberei que l sei?
Naço, bibo, lhebo camino por um çtino an que nun mando,
Sinto, pienso, mobo-me por ua fuorça sterior a mi.
Anton quien sou you?

Sou, cuorpo i alma, l sterior dun' anterior qualquier?
Ou la mie alma ye la cuncéncia que la fuorça ounibersal
Tien de l miu cuorpo por drento, ser defrente de ls outros?
No meio de todo adonde stou you?

Muorto l miu cuorpo,
Çfeitos ls mius miolhos, 
An cousa abstracta, ampessonal, sin forma,
Yá nun siente l you que you tengo,
Yá nun piensa cun ls mius miolhos ls pensamientos que you sinto mius,
Yá nun bulhe pula mie buntade las mies manos que you bulho.

Stacarei assi? Nun sei.
Se tubir de stacar assi, tener pena de assi quedar,
Nun me tomará eimortal.

Alberto Caeiro, in "Poemas Inconjuntos"

publicado por Streilha às 22:33 | link de l post | comentar | Juntar als faboritos
Segunda-feira, 21.09.09

Biaige

I cumo stou an maré de Miguel Torga, puis que Miguel Torga seia. I cumo todos andamos an biaige quer seia na bida, ne ls suonhos, ne ls pensamientos, ne ls trabalhos ou nas ambiçones ou an qualquiera outra cousa, hoije deixo acá l poema "Biaige" de Miguel Torga.

 

Biaige

 

Aparelhei l barco de l' eiluson
I reforcei la fé de marinheiro.
Era lhonge l miu suonho, i traiçoneiro
L mar…
(Solo nos ye cuncedida
Esta bida
Que tenemos;
I ye drento deilha que ye perciso
Percurar
L bielho paraíso
Que perdimos).

Deligeiro, lharguei la bela
I dixo adius al cais, a la paç tolhida.
Sien medida,
La rebuolta eimensidon
Transforma die a die la embarcaçon
Nua bagamunda i alada sepultura…
Mas corto las ondas sien desanimar.
An qualquier abentura,
L que ampuorta ye partir, nun ye chegar.


Saludaçones.

sinto-me:
música: Por uma noite by Klepht
publicado por Streilha às 03:08 | link de l post | comentar | Juntar als faboritos
Terça-feira, 15.09.09

Simples

Ye angurriado i perfeito. Ye de Miguel Torga. Ye un pequeinho poema: apuis de muito tiempo sien nada dezir.

 

De tanto mirar l sol,
queimei ls uolhos,
De tanto amar la bida anlhouqueci.
Agora sou ne l mundo esta negrura. 
A la percura
De la lhuç i de l juizio que perdi.

sinto-me:
música: Tão perto e tão longe by Hands on Aproach
publicado por Streilha às 04:10 | link de l post | comentar | Juntar als faboritos
Domingo, 24.05.09

L poema que más me gusta

You sei que ye un cliché i sei que toda la giente l conhece i diç que l adora, mas mesmo assí i de qualquiera forma continua a ser l poema de la mie bida, l poema que más me gusta antre todos. Fai-me pensar i pienso que me retrata, a mie, mas tamien a todos nós que fazimos l nuosso própio çtino... i quien mos dera a todos tener l' arte que tenie Régio pa tan bien dezir (ou screbir) aquilho que pensaba.

 

 

Cântico Niegro

 

"Ben por eiqui" -  dizen-me algunos cun uolhos doces,
Stendendo-me ls brácios, i seguros
De que serie buono se you ls oubisse
Quando me dizen: "ben por eiqui"!
You miro-los cun uolhos anfadados,
(Hai, nos mius uolhos, ironies i canseiras)
I cruzo ls brácios,
I nunca bou por eilhi...

La mie glória ye esta:
Criar zoumanidade!
Nun acompanhar a naide.
- Que you bibo cun l mismo sien-buntade
Cun que rasguei l bentre a mie mai.

Nó, nun bou por ende! Solo bou por adonde
Me lheben mius própios passos...

Se l que busco saber ningún de bós respunde,
Por que me repetis: "ben por eiqui"?
Prefiro arrebalar an becos anchoquecidos,
Boltiar als bientos,
Cumo farrapos, arrastar ls pies ansangrados,
A ir por ende...

Se bieno al mundo, fui
Solo pa zgalhar florestas birges,
I dezenhar mius própios pies na arena inda nun splorada!
L mais que fago nun bale nada.

Cumo, puis, sereis bós
Que me dareis machados, ferramientas, i coraige
Para you birar ls mius ampecilhos?...
Corre, nas buossas benas, sangre bielho dos abós,
I bós amais l que ye fácil!
You amo l Lhonge i la Miraige,
Amo ls abismos, las torrientes, ls desiertos...

Ide! tendes stradas,
Tendes jardins, tendes canteiros,
Tendes pátrias, tendes tectos,
I tendes regras, i cumbénios, i filósofos, i sabidos.
You tengo la mie Lhoucura!

Lhebanto-la, cumo un fachuco, a arder na nuite scura,
I sinto scuma, i sangre, i cânticos ne ls beiços...
Dius i l Diabo ye que me guian, más naide.
Todos tubiran pai, todos tubiran mai;
Mas you, que nunca ampeço nien acabo,
Naci de l amor que hai antre Dius i l Diabo.

Ah, que naide me dê piedosas antençones!
Naide me pida definiçones!
Naide me diga: "ben por eiqui"!
La mie bida ye ua airaçada que se soltou.
Ye ua onda que s' alhebantou.
Ye un átomo a más que s' animou...
Nun sei por adonde bou,
Nun sei pr' adonde bou,
- Sei que nun bou por ende.

José Régio, Poemas de Deus e do Diabo

 

Saludaçones.

música: Remédio Santo by Marta Plantier
tags:
publicado por Streilha às 03:24 | link de l post | comentar | Ber comentairos (1) | Juntar als faboritos
Segunda-feira, 06.04.09

Nina de l'Alto de la Sierra

 

Nina de l mirar sereno
Raiando pula manhana
De seno duro i pequeinho
Nun jaletico de lhana
Nina cheirando a feno
Casada cun hourtelana
Nina que ne l camino
Bás pisando fermosura
Trais ne ls uolhos un nial
Todo an prumas de ternura
Nina de l mirar de lhino
Cun rigueiro a la cintura
Nina de saia als fuolhos
Quien la bei queda lhabado
Auga de la sede de ls uolhos
Pan que nun fui amassado
Nina de risa als manolhos
Mie seiba de pinho
Nina de saia als fuolhos
Alfazema sien canteiro
Nina de cuorpo anteiro
Cun tranças de madrugada
Que se lhebanta purmeiro
Do que la tierra alborotada
Nina de fato nuobo
Ade-Marie de la tierra
Rosa braba, rosa pobo
Reciu de l'alto la sierra.

 

Saludaçones.

sinto-me:
publicado por Streilha às 00:26 | link de l post | comentar | Ber comentairos (1) | Juntar als faboritos
Quarta-feira, 21.01.09

La Cantiga de l Campo

 

 

Porqu' andas tu mal cumigo,
ò mie doce trigueira,
quien me dera ser l trigo.
Qu' andando pisas n' eira.

Quando antre las demás rapazas
Bais cantando antre las senaras
You choro a oubir-te las cantigas
que cantas nas manhanas claras.

Por isso nada me medra
Ando curbado i selombriu
Quien me dera ser la piedra
an que tu lhabas ne l riu.

I falan cun tristes bozes,
De l tou amor singular
Aqueilha casa adonde coses
cun baranda pa l mar

(i) por isso nada me medra
ando curbado i selombriu
quien me dera ser la piedra
an que tu lhabas ne l riu.

 

Saludaçones.

tags:
publicado por Streilha às 03:50 | link de l post | comentar | Juntar als faboritos
Segunda-feira, 22.12.08

All I want for Christmas

Diç que yá stamos ne l Natal. Puis que seia. I que quede ne l blog un cachico de l spírito de l Natal... cun ua cantiga que yá se bai tornando clássico deste tiempo.

 

All I want for Christmas is you / Todo l que you quiero ne l Natal sós tu

 

You nun quiero muito pa l Natal
Solo perciso dua cousa
You nun quiero saber de las prendas
Por ambaixo de la arbre de Natal
Mais do que puodes eimaginar
Faç l miu deiseio tornar-se berdade
Todo l que you quiero pa l Natal sós tu

You nun quiero muito pa l Natal
Solo perciso dua cousa
You nun quiero saber de las prendas
Por ambaixo de la arbre de Natal
You nun perciso de poner la meia
Arriba de la lhareira
L Pai Natal nun me bai a fazir feliç
Cun brinquedo neste die

You quiero-te só pra mi
Torna l miu deseio berdade
Todo l que you quiero pa l Natal sós tu

You nun pido muito pa l Natal
You nien sequiera pido niebe i you
You solo quiero cuntinuar a la spera
Por ambaixo de la arbre

You nun bou fazir ua lhista
Pa l Pólo Norte, pa l San Nicolau
You nien sequiera bou quedar acordada(o) até mi tarde
P'oubir ls sinicos mágicos

Porque you solo te quiero eiqui esta nuite
Mi abraçadico(a) a mie
Que mais puodo you fazir
Ahh todo l que you quiero pa l Natal sós tu

Todas las lhuzes stan a relhampar
Tan brilhantes an todo l lhado
I l son de ls ninos
Ls sous risos ne l aire

I todos stan a cantar
You ouço todos ls sinos a tocar
Pai Natal nun me bás a trazir
Aquelhe(a) que you quiero
Por fabor, Pai Natal traç-me-lo(a)

Ohh ohh, You nun quiero muito pa l Natal

Isto ye todo l que you pido
You só te quiero ber
Parado(a) bien na friente de la mie puorta

Ohh ohh, You solo te quiero pra mie
Mais do que tu puodas eimaginar
Torna l miu deseio berdade
Ohh todo l que you quiero ne l Natal sós tu

Todo l que you quiero pa l Natal sós tu...

 

Buono Natal i Buonas fiestas an geral pa toda la giente.

 

Saludaçones.

sinto-me:
música: All I want for Christmas is You by Mariah Carey
publicado por Streilha às 00:09 | link de l post | comentar | Ber comentairos (1) | Juntar als faboritos

mais sobre mi

percurar

 

Julho 2013

D
S
T
Q
Q
S
S
1
2
3
4
5
6
7
8
9
10
11
12
14
15
16
17
18
19
20
21
22
23
24
25
26
27
28
29
30
31

posts inda calenticos

últimos comentairos

  • Poesie linda! Muitos Parabienes! :-)
  • Buonas nuites,O IV Encontro dos Blogueiros Mirande...
  • L poema yá ye magnífico an pertués mas, an mirandé...
  • Que raposa mas guapa¡¡;)
  • Bun anho nuobo
  • bonita a musica
  • Precissamos ajuda com a Biquipédia mirandesahttp:/...
  • Muito lindo. Regressei hoje das terras de Miranda ...
  • Nun sera ua storia de plasticos ou algo assi ?
  • PATRIMÓNIO ORAL E IMATERIAL DAS TERRAS DE MIRANDA....

Posts mais comentados

arquibos

tags

links

participar

subscrever feeds

blogs SAPO