Andar por ende a pensar...

I porque nó hoije dibagar? Yá hai muito que nun scribo eiqui i hoije quando, finalmente tubo tiempo pra me aperceber disso, nun me apeteciu apresentar outra cunta.

Hai dies an que acordamos i pensamos, hoije quiero dibagar. Quiero deixar mie alma bolar por ende i çcubrir nuobos mundos drento del miu yá bielho i algo conhecido mundo interior.

Cumo ye buono pensar, que por uns momientos, pudimos sonhar i boltar ser pequeinhos outra beç. Cumo serie buono acreditar que todos cuntinuan a ter drento de si ua nina ou un nino, que tornasse l riso de cada un mais profundo, mais alegre, mais burdadeiro. Puis quando un nino ou ua nina ri, nada mais l’ampuorta nel mundo, nada mais eisiste. Quantas de las pessonas adultas que conhecimos cunsiguen fazir isto? I nós será que inda somos capazes? Cumo serie buono cunseguir cuntinuar a acreditar ne ls cuntos de fadas i nas stórias d’ancantar! Pensar que ls buonos tenen siempre un final feliç i que la justicia ganha siempre nel fin! Que buono starie l mundo se la bida fuosse assí! Querie, de burdade, cumo ls ninos, que l mundo fusse cada beç melhor. Cumo gostaba que toda la giente boltasse a crer, que se cada un fizesse un cachico l mundo serie melhor. Querie tanto i tantas cousas...

Por mie parte, resta-me acreditar nel que li hai algun tiempo nun eiditorial del Jornal de Notícias, que yera qualquiera cousa deste género: pudimos ter ls gobiernos i presidentes que quesirmos, mas se cada un de nós nun trabalhar, se cada un de nós nun der l melhor de si an todas las áreas de la sue bida, l mundo nunca será melhor, l paiç nun irá melhorar, la nuossa bida nunca será tan buona cumo queremos.

Cuntinuo, portanto, a studar para un die dezir, que con tudo aquilo an que acredito, stou a contribuir para que algo seia melhor neste mundo, mas dende sin la eigenuidade de ls ninos i sí cun toda la sapiencia possible de ls mais bielhos. Sabiendo siempre, que para alcançar l conhecimiento de ls de mais eidade ye preciso nun çquecir l que daprendimos de nuossos pais quando yeramos pequeinhos...

 

I porque yera toda la einocencia i toda la eissencia de las cousas que Alberto Caeiro tentaba descrebir an sous poemas, eiqui queda l que se me lhembrou hoije:

 

L miu olhar ye nítido cumo un girassol.

Tengo l costume de andar pulas stradas

Olhando para la dreita i para la esquierda,

I de beç an quando mirando pa traç...

I l que beio a cada momiento

Ye aquilho que nunca antes you tenie bisto,

I you sei dar por isso muito bien...

Sei ter l pasmo eissencial

Que ten ua criança se, al nacir,

Reparasse que nacira de burdade...

Sinto-me nacido a cada momiento

Para la eiterna nobidade de l Mundo...

Creio nel mundo cumo nun malmequer,

Porque l beio.

Mas nun pienso nele

Porque pensar ye nun cumprender...

L Mundo nun se feç para pensarmos nele

(Pensar ye star doente de ls uolhos)

Mas para olharmos para el i starmos d’acordo...

You nun tengo filosofie; tengo sentidos...

Se falo na Naturieza nun ye porque saiba l que eilha ye,

Mas porque la amo, i amo-la por isso

Porque quien ama nunca sabe l que ama

Nien sabe por que ama, nien l que ye amar...

Amar ye la eiterna einocência,

I la única einocência ye nun pensar...

 

Cun las melhores saudaçones,

Raposa.

sinto-me: sonhar...
música: Amar by TUNAF
publicado por Streilha às 00:03 | link de l post | Juntar als faboritos