La matancia

Todos ls anhos neste tiempo, an todas las casas de las nuossas aldés, las pessonas matan l cochino i fazen l fumeiro que todos gostamos de porbar pul Natal. Fazen-se las chouriças, las tabafeias, ls buteilhos, ls salpicones, las bochas... i ls chabianos.

Hoije ancuntrei ua stória d'un rapaç que nun dou oubidos a sue mai e apuis arrebentou l chabiano, querie-lo comer... mas l melhor ye lerdes la lhona pa saberdes cumo todo acunteciu:

Ua beç, anton, ua mulhier tenie un garoro i puso-le l almuorço a cozer i metiu na panela un chabiano a cozer, i apuis deixou l garoto al lhume i eilha fui a la missa, i dixo pal garoto:
— Olha, queda un chabiano a cozer, mas nun andes pori alhá a mexer, que apuis arrebenta-se.
L garoto, assi que la mai saliu pa la missa, el ampeçou lhougo a mexer alhá, starie-le cun ganas... I apuis, quando fui a ber, yá staba arrebentado. Agarrou, i fui a chamar la mai a la missa. Apuis, anton chegou a la borda deilha, na missa i dixo-le:
— Ah mai, andai para casa!
I la mai puso l dedo na nariç i dixo-le:
— Shi..., shi..., cálha-te!
I apuis el anraibou-se i dixo-le an boç alta no meio de la missa:
— Nien chit, nien chitote, arrebantou-se l chabianote, se le quereis benir a queme-lo beni, senó como-lo you solote.

testo de l sítio mirandes.net

Spero que tenhades gustado de la lhona i que quando for la buossa matancia nun ajudeis sólo a comer mas tambien a matar i a purparar l cochino, porque cumo toda la giente sabe nestas alturas hai trabalho pa todos.

Cun las melhores saudaçones,

Raposa

sinto-me: e tb portista: FCP!!!
música: "Da próxima vez" by Luís Represas
publicado por Streilha às 16:59 | link de l post | Juntar als faboritos