Nun hai mal que pra siempre dure...

Nin bien que nun s'acabe. I de que stou you a falar? Puis de ls exames. Por causa deilhes, yá há algun tiempo que nun tengo posto testos nuobos nel blog. Mas, ampeçou, agorica Febereiro i hai muitas cousas pa dezir. L paiç anda todo aporgatado por causa de l  referendo al abourto, ye compreensible. Esta ye ua queston amportante, sobre la qual todos debemos pensar, puis nel próximo deimingo, bamos a tener que dezir se cuncurdamos ou nó cun la despenalizaçon de l abuorto. You pienso que l que stá an causa niestas eileiçones nun ye se cada un de nós ye a fabor ou cuontra l abuorto. Quier-me parecir que la eissencia de l referendo ye cada un de nós puder decidir se quier fazir ou nó un abourto: quien quejir fai ante alguas condiçones, quien nó, naide l'oubriga.

Mas oupiniones a la parte, apuis de l referendo ye l die de S. Balentin, que apesar de nun tener ningua raiç ni an tierras de Miranda, ni an Pertual ye festejado por toda la mocidade. Niesse die, passamos mais tiempo con la pessona de quien gostamos, damos-le un presente i quedamos mais ounidos que nels outros dies. Por la mie parte, acho que debíamos star cun la pessona de quien gostamos todos ls dies cumo quedamos nel die de S. Balentin i nieste die debemos dar a la pessona algo nuosso, que tenga significado pa ls dous, de modo a que esta data nun se torne só nua çculpa pa dar presentes. Nieste die, muitos quedan tan junticos, tan junticos, que se çquecen de l resto i al fin hai porblemas cumo l de l abuorto. Por isso, tende cuidado i nun bos precipiteis porque l melhor mismo, ye nunca tener que decidir se se bai ou nó a fazir un abuorto.

I pa bos rirdes un cachico, deixo-bos cun esta quadra:

Fernando por ber las moças
fiç ua fuonte de prata
las moças nun ban alhá
Fernando todo se mata!

Cun las melhores saudaçones,

Raposa.

 

sinto-me:
música: '18 till I die' by Brian Adams
publicado por Streilha às 17:05 | link de l post | Juntar als faboritos