L gueiteiro

Stamos nel Berano i portanto antremos an tiempo de çcanso i de fiestas.

Antigamiente, cumo nun habie cunjuntos de músicas pa animar las fiestas, ls mordomos chamaban ls gueiteiros. Hoije, ainda ls chaman, mas yá só ye pra tocaren la alborada i durante la missa.

Entretanto, quando l gueiteiro iba passando por las aldés, quedaban siempre stórias pa cuntar. I de las muitas stórias que se cuntaban datrás muitas transformaban-se an músicas.

Hoije, stando you a ber l cancioneiro tradicional mirandés ancuntrei ua cantiga que toda la giente conhece, mas que quaise naide sabe la música anteira.

La cantiga chama-se "Lenga lenga de la mulhier que biu l gueiteiro" i ye mais conhecida por "Bi benir la gaita". Eiqui bos la deixo:

Bi benir la gaita,

Al cimo del lhugar

Pousei la mie roca

I pus-me a beilar!

I tanto beilei,

A la porta del forno,

I tanto beilei

Que me dórun un bolho!

I tanto beilei,

Cula gaita galhega,

I tanto beilei

Que me namorei deilha!...

Bi benir la gaita

I l gueiteiro nó,

Oh que pena tengo,

Nel miu coraçon!...

Beila l beilarico

Beila-lo bien beilado

De hoije an nuobe meses

Habemos de fazer l baptizado!....

 

Cun las melhores saudaçones,

Raposa.

sinto-me:
publicado por Streilha às 13:38 | link de l post | comentar | Juntar als faboritos