"Ser Português é ter...

... Sangue frio, ter amor à Pátria, por isso serei sempre fiel à Pátria do meu coração." Ye esta la frase que todos ls studantes de la Academie Militar saben de cor i ye esta tamien la frase que todos ls pertueses debian saber i acima de todo sentir. Niestes últimos tiempos ten habido ua grande çcuçon acerca la queston de ser pertués i de cumo deben ser tratados ls strangeiros.

You, cumo todos bós sabeis, sou ua pertuesa que ama la Pátria arriba de todo, que s'ougurlha muito de ter nacido nieste paiç i pienso que ser de Pertual ye ua honra a que só quinze milhones de pessonas nel mundo tenen dreito. Assí, siendo portadora diesta honra, tengo, tal cumo debian todos ls pertueses (principalmente ls de la extrema-dreita), de ser fidalga de spírito, antenda-se ter eilebados balores morales, de ser diplomata, de ser buona oubinte, de ser buona anfritriana, de ser ua pessona honrada e de honrar pai, mai, la família i l paiç.

Que eijista quien nun queira ls strangeiros an Pertual ye normal, puis bibimos an lhiberdade i cada un puode ter la sue propria oupinion, mas dezir, mais, afirmar an publico que ls strangeiros se debian ir ambuora nun ye ser buonos diplomatas, nun ye ser buonos anfitrianos, lhougo nun ye cumportarmo-nos a la altura de la honra que ye sermos Pertueses.

Apuis, nun nos podimos çquecer que antes de sermos un paiç de imigraçon ya eramos un paiç de eimigrantes i you fago la pregunta: gustaríades que ls franceses, ls suiços, ls alemanes i tantos outros tratassen mal un pertués, una pessona nuossa compatriota? Isto nun ten que ber cul facto de cuncordarmos ou nó cu la eimigraçon de ls pertueses, mas si cul facto de isto ser la realidade. I tamien ye realidade que l trabalho que ls strangeiros fazen an Pertual ye l trabalho que ls pertueses nun quieren ya fazir ou que l stado nun deixa ls pertueses fazir, ambora este último punto pariece que ya stá a melhorar pa ls Pertueses.

Seamos claros, quien ten ourgurlho de ser Pertués debe cumportar-se a la altura i nó amborgonhar l paiç, apuis quien ten un grande número de eimigrantes nun ten l dreito de star cuontra la imigraçon inda que tenga razones bálidas, por fin se eilhes fazen l trabalho que ls pertueses ya nun quieren, isso quier dezir que nos stan a prestar un serbiço, que stan a pagar ampuostos al nuosso stado i que stan a cuntribuir pal crecimiento de la economie.

Nun stou a defender ls imigrantes ni tan pouco quiero dezir que l PNR nun tenga rezon nalguas cousas, mas quando fazimos las nuossas oupiniones debemos siempre ter an cuonta ls dous lhados de la queston, debemos tentar (inda que nunca se cunsiga, porque cada pessona ye única i special) ser cumo la justicia: ciega i imparcial. Pienso you que así poderemos ter ua bison mais real de l mundo que stá a la nuossa buolta, mas cumo you disse esta ye só la mie oupinion, que stamos an democracie i ainda puode ser pronunciada.

 

Cun las melhores saudaçones,

Raposa.

 

sinto-me: Pertuesa siempre
música: Oxalá by Madredeus
publicado por Streilha às 00:47 | link de l post | comentar | Juntar als faboritos