Diairo de Biaige - Parte I

Hoije ye l purmeiro die del resto de la mie bida...

Hoije ampeço un diairo de biaige, un diairo de las ferias, un diairo de la mie tierra, un diairo del miu paiç, un diairo de las cousas que nos rodeian... anfin un diairo de todo l que se bai passando, die ante die, a la nuossa buolta.

Hoije acordei i l die ampeçou pra mi. Tarde, ampeçou tarde, puis l sol yá iba alto nel cielo, mas ampeçou alegre i guapo cumo todos ls dies de Berano, que son chenos de lhuç i de calor. Miro a la buolta i nun beio naide. Quien querie you ber? A las bezes nun pensamos porquei ou cumo pudimos pensar l que pensamos. Cumplicado, confuso? No, simplesmente sien sentido. Si, porque ni tudo na bida ten sentido... todo ten ua rezón, ainda que nun la beiamos, mas ni todo tien sentido. I antretanto, ambrenhada nels mius pensamientos l tiempo passou i la bida cuorre. Perdida por ua tierra que nun ye aqueilha an que naci, dou por mi a perseguir l tiempo que me scapa por antre ls dedos, l tiempo que nun spera por mi ou por nós.

Fui saber las nuobas del mundo i dou por mi a pensar se saber las notícias nun ye tamien ua cuscobilhice. Afinal de cuontas las nuobas son noticias acerca del que outras pessonas fázen i la maiorie de las bezes, las pessonas de que se fala nun son aqueilhas que nos gobiernan ou aqueilhas que d’algua forma afectan la nuossa bida. Son simplesmente pessonas que tubírun suorte ou que tubírun azar ou simplesmente que les acunteciu algo de diferente. Que tenemos nós a ber cun isso? Ye dende que la nuossa natureza humana se manifesta: somos seres sociales i precisamos de cumbibir i de nos relacionarmos i de nos preocuparmos cun ls outros, ambora, aparientemente, nada disso seia necessairo pa la nuossa sobrebibência. Son l tipo de cousas que nun se beian ou pálpan, son las cousas que tan somiente se sientan.

Apuis de ber l que de nuobo há, dou por mi a oubir ua cantiga que me fai nuobamiente cair nels caminos de la filosofie. Buterflies and hurricanes... borboletas i tampestades, aparientemente nada ten que ber ua cousa cun la outra, mas ls cientistas i ls ambientalistas dizen que si. Dizen que l bater de asas de ua borboleta puode causar ua tampestade nal outro lhado del mundo. Queda difícil acreditar, mas tamien queda ua doce i triste ironie. Ye sin dúbida ua de las maiores antíteses de la mai Naturieza. Cumo puode un ser tan frágil, tan pequeinho, tan belo, tan perfeito de tan éfemero que ye causar un furacón que ye tan biolento, tan grande, tan feio, tan malo que só causa destruiçon. L paradoxo del clima.

Buono i cumo tengo más que fazir, fago-me a la bida i apuis de un die bolbido, nel meio del scuro de la nuite regresso a las mies filosofies, porque... durante l die fui-me a tener cun ls seres cuja mie falta les fai chamar-me, cun ls seres cuja sue falta a eilhes m’atrai...

Cun las melhores saudaçones,

Raposa.

sinto-me:
música: "How do you feel tonight" by Bryan Adams
publicado por Streilha às 01:34 | link de l post | comentar | Ber comentairos (1) | Juntar als faboritos